កំពង់ផែស្វយ័តក្រុងព្រះសីហនុ (កសស) ត្រូវបានសាងសង់លើកដំបូងនៅឆ្នាំ ១៩៥៦ ហើយចាប់ផ្ដើមបន្តប្រតិបត្តិការអាជីវកម្មជាថ្មីឡើងវិញក្រោយឆ្នាំ ១៩៧៩ ដោយប្រតិបត្តិការនៅពេលនោះ ផ្ដើមចេញពីទ្រង់ទ្រាយតូចតាមរយៈការប្រើប្រាស់កម្លាំងកម្មករ ធនធានមនុស្សផ្ទាល់ សម្ភារបរិក្ខារ និងមធ្យោបាយគ្រឿងចក្រធម្មតា ដើម្បីធ្វើការលើកដាក់ទំនិញកុងតឺន័រ និងបម្រើឲ្យការដឹកជញ្ជូនរបស់ខ្លួន ។ ចាប់តាំងពីពេលនោះមក ដោយមានការសិក្សា និងការធ្វើឲ្យប្រសើរឡើងជាបន្តបន្ទាប់ ព្រមទាំងជំនួយបច្ចេកទេសពីបណ្ដាភ្នាក់ងារអភិវឌ្ឍន៍ និងប្រទេសជាបងប្អូនជាច្រើនផ្សេងទៀត កំពង់ផែបានរីកចម្រើន និងបោះជំហានទៅមុខឥតឈប់ឈរ ។
ដើម្បីដើរឲ្យទាន់បរិមាណទំនិញ ដែលបន្តកើនឡើងពីដើមទសវត្សរ៍ឆ្នាំ ១៩៩០ កំពង់ផែបានប្រែក្លាយមធ្យោបាយដឹកជញ្ជូនពីទំនិញវេចខ្ចប់ ទៅជាទំនិញកុងតឺន័រវិញ ។ ដើម្បីធ្វើឲ្យមានលក្ខណៈងាយស្រួល និងមានប្រសិទ្ធភាពបន្ថែមទៀត តម្រូវការអភិវឌ្ឍន៍ចំណតផែកុងតឺន័រមួយ ត្រូវបានសម្រេចឡើងនៅពេលនេះ ហើយដោយមានជំនួយការពីរាជរដ្ឋាភិបាលកម្ពុជា និងទីភ្នាក់ងារសហប្រតិបត្តិការអន្តរជាតិជប៉ុន (JICA) ចំណតផែកុងតឺន័រនោះ ត្រូវបានសាងសង់ឡើង និងត្រូវបានដាក់ឱ្យប្រតិបត្តិការ នៅឆ្នាំ២០០៧។
ក្នុងខណៈពេលដែលប្រទេសកម្ពុជាមានកំណើនសេដ្ឋកិច្ចជាបន្តបន្ទាប់ កសស ក៏បានអភិវឌ្ឍសមត្ថភាពរបស់ខ្លួនជាបន្តបន្ទាប់ផងដែរ។ រដ្ឋាភិបាលជប៉ុនក៏បានបន្តគាំទ្រផ្នែកហិរញ្ញវត្ថុ ចំពោះការអភិវឌ្ឍរបស់ កសស។ ជាលទ្ធផល កសស បានសាងសង់ តំបន់សេដ្ឋកិច្ចពិសេស ក្នុងឆ្នាំ ២០០៩ និងដាក់ឱ្យប្រើប្រាស់សម្រាប់ប្រតិបត្តិការ នៅឆ្នាំ ២០១២។ តំបន់សេដ្ឋកិច្ចពិសេសនេះ មានផ្ទៃដីទំហំ ៦៣,២ ហិកតា មានទីតាំងជាប់នឹងចំណតផែកុងតឺន័រ។ ជាកិច្ចបន្ទាប់ទៀត កសស បានសាងសង់ ចំណតផែពហុបំណង ក្នុងឆ្នាំ ២០១៥ និងដាក់ឱ្យប្រើប្រាស់ នៅឆ្នាំ ២០១៨។ ចំណតផែពហុបំណងនេះ មានមុខងារចំនួន ០២ មានដូចជា ចំណតផែទំនិញរាយ និងទំនិញចាក់ធារ។ បន្ទាប់មកទៀត កសស ក៏បានធ្វើការកែសម្រួលចំណតផែទំនិញទូទៅ ទៅជាចំណតផែកុងតឺន័រ ប្រវែង ២៥៣ ម៉ែត្រ ក្នុងឆ្នាំ ២០២៣ និងដាក់ឱ្យដំណើរការនៅឆ្នាំ ២០២៤។
